News details

پی ایس ایل: لاہور قلندرز نے ملتان سلطانز کو سنسنی خیز مقابلے کے بعد شکست دے دی

پاکستان سپر لیگ کے دسویں میچ میں لاہور قلندرز نے سنسنی خیز مقابلے کے بعد ملتان سلطانز کو چھ وکٹوں سے شکست دے دی۔

07-Mar-2019

پاکستان سپر لیگ کے دسویں میچ میں لاہور قلندرز نے سنسنی خیز مقابلے کے بعد ملتان سلطانز کو چھ وکٹوں سے شکست دے دی۔

اے بی ڈی ویلیئرز اور ڈیوڈ وائز کی جارحانہ بیٹنگ کی بدولت لاہور قلندرز نے ملتان سلطانز کی جانب سے دیا گیا 201 رنز کا ہدف آخری اوور کی آخری گیند پر حاصل کر لیا۔ اے بی ڈی ویلیئرز مین آف دی میچ قرار پائے۔

اے بی ڈی ویلیئرز نے 29 گیندوں پر 52 رنز کی اننگز کھیلی اور وہ ناٹ آؤٹ رہے جبکہ ڈیوڈ وائز 20 گیندوں پر 45 رنز بنا کر ناٹ آؤٹ رہے۔

لاہور قلندرز کو اننگز کی آخری گیند پر جیتنے کے لیے تین رنز درکار تھے۔ ڈیوڈ وائز نے چھکا لگا کر قلندرز کو فتح سے ہمکنار کیا۔پاکستان سپر لیگ کے دسویں میچ میں ملتان سلطانز نے اپنے اوپنرز کی جارحانہ بلے بازی کی بدولت لاہور قلندرز کو جیتنے کے لیے 201 رنز کا ہدف دیا تھا۔

35 کے مجموعی سکور پر ملتان سلطانز کو پہلی کامیابی ملی جب لاہور قلندرز کے اوپنر سہیل اختر 10 رنز بنا کر محمد الیاس کی گیند ہر کیچ آؤٹ ہوئے۔

دوسرے آؤٹ ہونے والے بلے باز فخر زمان تھے جو 35 گیندوں پر 63 رنز بنا کر جنید خان کی گیند پر کیچ آؤٹ ہوئے۔

سپاٹ فکسنگ سکینڈل میں سزا یافتہ بلے باز سلمان بٹ جو پی ایس ایل میں اپنا پہلا میچ کھیل رہے تھے صرف 17 رنز بنا پائے۔ آغا سلمان نے دو رنز بنائے جبکہ دو رنز بنا کر برینڈن ٹیلر ریٹائرڈ ہرٹ ہو گئے۔

تاہم اس کے بعد شروع ہونے والی اے بی ڈی ویلیئرز اور ڈیوڈ وائز کی 98 رنز کی دھواں دار شراکت میچ کے آخر تک قائم رہی۔

ملتان سلطانز کی جانب سے 39 رنز کے عوض تین وکٹیں لے کر جنید خان نمایاں بولر رہے۔

جیمز ونس اور عمر صدیق کی شاندار بلے بازی کے سامنے لاہور قلندرز کے بولرز بے بس نظر آئے۔ ان دونوں نے نصف سنچریاں بنائیں اور ان کے درمیان 135 رنز کی شراکت ہوئی۔

لاہور قلندرز کو پہلی کامیابی جیمز وینس کی وکٹ کی صورت میں ملی جو چھ چھکوں اور سات چوکوں کی مدد سے 41 گیندوں پر 84 رنز بنا کر سندیپ لمیچن کی گیند پر فخر زمان کے ہاتھوں کیچ آؤٹ ہوئے۔

دوسرے آؤٹ ہونے والے بلے باز شعیب ملک تھے جو 10 رنز بنا کر سندیپ لمیچن کی ہی گیند پر کیچ آؤٹ ہوئے۔

عمر صدیق 53 رنز بنانے کے بعد شاہین آفریدی کی گیند پر آؤٹ ہوئے جبکہ آندرے رسل صرف سات رنز بنا پائے۔

پانچویں آؤٹ ہونے والے بلے باز ڈین کرسچیئن تھے جو 21 رنز بنا کر رن آؤٹ ہوئے جبکہ لوری ایونز آٹھ رنز بنا کر حارث رؤف کی گیند پر کیچ آؤٹ ہوئے۔

46 رنز کے عوض تین وکٹیں حاصل کر کے سندیپ لمیچن قلندرز کی جانب سے نمایاں بولر رہے جبکہ شاہین شاہ آفریدی اور حارث رؤف نے ایک، ایک کھلاڑی کو آؤٹ کیا۔

اب تک ٹورنامنٹ میں دونوں ٹیمیں تین، تین میچ کھیل چکی ہیں اور ان میں سے دو، دو میچوں میں انھیں شکست کا سامنا کرنا پڑا ہے اور یہ ایک، ایک میچ جیتی ہیں۔

لاہور قلندرز کی ٹیم: فخر زمان، سلمان بٹ، اے بی ڈی ویلیئرز، سہیل اختر، سلمان آغا، برینڈن ٹیلر، ڈیوڈ وائز، سندیپ لمیچن، شاہین شاہ آفریدی، حارث رؤف اور راحت علی

ملتان سلطانز کی ٹیم: شعیب ملک (کپتان)، جیمز ونس، لوری ایونز، ڈین کرسچیئن، آندرے رسل، عمر صدیق، حماد اعظم، جنید خان، محمد الیاس، عرفان خان اور محمد عرفان

BY:

BBC

https://www.bbc.com/urdu/sport-47331924

#LahoreQalandars